🔴DERSÎM – Erdnîgariya Dersîmê ku bi dewlemendiya xwe ya siruştî û ajalên kêmpeyda tê naskirin, vê carê li Çemê Pulemoriyê dîmenekî bêhempa pêşkêşî hezkiriyên xwezayê kir. Li devera ku Mûzir bi masiyên xwe yên pelsor (alabalık) û çiyayên xwe bi xezalan navdar e, Çemê Pulemoriyê jî bi Segavekî (Su Samuru) ku bi lîstik û reqsa xwe bal dikişand, bû rojev.
Surprîza li Çemê Pulemoriyê
Siruşta Dersîmê her carê bi surprîzeke nû derdikeve pêşberî mirovan. Li kêleka masiyên pelsor yên Çemê Mûzirî û xezalên li ser lûtkeyên çiyayan, vê carê li qeraxê Çemê Pulemoriyê Segavek/Seyê Avî hat dîtin. Segav ku li nav avê dileyîst û wekî ku “sema bigire” tevgerên balkêş dikirin, rastî kameraya çavdêrê xwezayê hat.
Kameraya Îsmaîl Yoleri Tomar Kir
Ev kêliyên taybet û kêmpeyda, ji aliyê parêzvanê siruştê yê naskirî Îsmaîl Yoleri ve hatin qeydkirin. Yoleri, dema ku li derdora çem lêkolîn dikir, rastî vê heywana şermok hat û bi serkeftin reqsa wê ya di nav avê de kişand ser kadraja (objektîf) xwe.
Ev dîmen careke din nîşan dide ku ekosîstema Dersîmê çiqasî zindî û parastî ye. Pispor balê dikişînin ser girîngiya parastina van herêman daku ev cureyên kêmpeyda bikaribin jiyana xwe bidomînin.
