🔴Şêwirmendê Ewlehiya Neteweyî ya Iraqê Qasim el-Erecî, îro bi Balyozê Fransayê yê Bexdayê Patrick Durel re hat cem hev.
Di hevdîtinê de ligel geşedanên herêmî, mijara ewlehiya mîsyonên dîplomatîk hat nîqaşkirin.
“Ewlehiya mîsyonên biyanî xeta me ya sor e”
Li gorî daxuyaniya Ofîsa Çapemeniyê ya Şêwirmendiya Ewlehiya Neteweyî, Erecî destnîşan kir ku hikûmeta Iraqê bi biryardarî pabendî parastina hemû balyozxane û mîsyonên dîplomatîk ên li welat e.
El-Erecî, xîtabî Balyoz Durel kir û ev îfade bikar anîn:
“Hikûmeta Iraqê di mijara parastina mîsyonên dîplomatîk de bi biryar e. Em ê tu carî rê nedin tu destwerdan an jî gefên li dijî ewlehiya mîsyonên biyanî û erebî yên ku li ser axa me ne.”
Ji bo Rojhilata Navîn banga aşitî û diyalogê
Di hevdîtinê de her wiha gavên ku ji bo kêmkirina rageşiya li Rojhilata Navîn bên avêtin jî hatin nirxandin. Her du alî li ser pêwîstiya zexta li ser civaka navneteweyî ji bo rawestandina şer û vegera li ser masa diyalogê ji bo pêkanîna aşitiyê li hev kirin.
Hat biryardan ku hevkariya ewlehiyê ya di navbera Bexda û Parîsê de bi awayekî ku piştgiriyê bide îstîqrara herêmî û gerdûnî berdewam bike.
/Çavkanî: Rd/
