🔴NÛPEL – Rêveberiya Tehranê pêşniyara Dewletên Yekbûyî yên Amerîkayê (DYA) ya ji bo agirbesteke du qonaxî bi awayekî fermî red kir û daxwazên xwe yên ji bo dawîanîna şer eşkere kirin.
Li gorî nûçeya Ajansa Nûçeyan a Fermî ya Îranê (IRNA), Tehranê bersiva xwe ya derbarê pêşniyara Washingtonê de bi rêya Pakistanê gihandiye aliyê Amerîkayê. Îranê di daxuyaniya xwe de destnîşan kir ku di bin şert û mercên heyî de agirbesteke demkî qebûl nakin û li şûna çareseriyên “paliyatîf”, divê gavên mayînde werin avêtin.
Şertê sereke: Rakirina dorpêçan û ewlehiya Tengavê
Di bersiva Tehranê de hat diyarkirin ku divê şer bi qebûlkirina daxwazên bingehîn bi dawî bibe. Îranê ji bo herêmê daxwaza “protokoleke ewlehiyê” kir û xalên sereke yên daxwazên xwe weha rêz kirin:
Tengava Hurmizê: Piştî bidawîbûna pevçûnan, divê derbasbûna ewle ya keştiyan di tengavê re were mîsogerkirin.
Dorpêçên Aborî: Rakirina hemû danekirin û dorpêçên aborî yên li ser Îranê.
Jinûve Avakirin: Piştî şer, divê piştgirî bidin pêvajoya jinûve avakirina herêmên wêranbûyî.
‘Çareseriyên demkî nayên qebûlkirin’
Rêveberiya Tehranê di peyama xwe de ragihand ku ew naxwazin pêvajoyê bi agirbestên demkî dirêj bikin. Hat destnîşankirin ku heta daxwazên wan ên aborî û polîtîk neyên qebûlkirin, ew ê li ser helwesta xwe ya niha berdewam bin.
Ev biryara Îranê di demekê de tê ku hewildanên dîplomatîk ên navneteweyî ji bo kêmkirina rageşiya li herêmê zêde bûne. Heya niha ji aliyê DYAyê ve derbarê bersiva Îranê de daxuyaniyeke fermî nehatiye dayîn.
