🔴Hêzên Hûsî yên Yemenê (Ensarullah) bi êrîşeke mûşekî ya balîstîk a li ser başûrê Îsraîlê, bi awayekî fermî ragihandin ku ew rasterast tevlî şer bûne.
NÛPEL – Di roja 29an a operasyonên DYA û Îsraîlê yên li dijî Îranê de, eniya şer li Rojhilata Navîn hîn bêtir berfireh bû. Hûsiyên Yemenê, piştî rageşiya bi mehan, cara yekem êrîşeke rasterast birin ser axa Îsraîlê.
Li Beershebayê Dengê Sîrenan: Mûşek Hat Hilweşandin
Sibeha roja şemiyê li bajarê Beersheba (Bir’üssebi) yê li başûrê Îsraîlê û derdora wê sîrenên hişyariyê hatin lêdan. Artêşa Îsraîlê (IDF) ragihand ku mûşekeke balîstîk a ji Yemenê hatibû avêtin, ji aliyê pergala parastina hewayî ya “Arrow” ve di hewayê de hatine îmhakirin. Li gorî daxuyaniya artêşê, di bûyerê de tu zirarên canî çênebûne.
Hûsî: “Tiliya Me Li Ser Tetikê Bû, Me Destpê Kir”
Berdevkê Leşkerî yê Hûsiyan Yahya Saree piştî êrîşê daxuyaniyek da û îdîa kir ku wan “bi gelek mûşekên balîstîk xalên leşkerî yên hesas ên Îsraîlê” kirine hedef. Saree destnîşan kir ku ev êrîş operasyona yekem a “midaxeleya leşkerî ya rasterast” e ku ji bo piştgiriya Îran û “eniyên berxwedanê” yên li Libnan, Iraq û Filîstînê hatî destpêkirin.
Yahya Saree diyar kir ku heta êrîşên Îsraîlê yên li ser Îran û herêmên din ranewestin, dê operasyonên wan berdewam bikin.
Metirsiya Şerê Herêmî Mezin Dibe
Tevlîbûna fermî ya Hûsiyan—ku wekî yek ji hevkarên herî girîng ên Îranê têne naskirin—wekî veguhastineke krîtîk di qursa şer de tê nirxandin. Piştî Hizbullaha Libnanê û komên şîe yên li Iraqê, bi tevlîbûna Hûsiyan re hemû aktorên nêzî Îranê li dijî eniya DYA-Îsraîlê cih girtin.
/rd/
