🔴NAVENDA NÛÇEYAN (Nûpel) – Kovara Dîcle ya ku li Şengalê bi zimanê Kurdî weşana xwe didomîne, bi hejmara xwe ya 39’an gihîşt ber destê xwendevanên xwe. Kovar di vê hejmarê de bi giranî cih dide mijarên dîrokî, çandî, bawerî û siyasî yên mehên Adar û Nîsanê.
Kovara Dîcle ya ku bi mijarên lêkolîn, dokumanter û lêgerînan tê naskirin, di destpêka biharê de bi naverokeke dewlemend derket pêşberî raya giştî. Di desteya weşanê ya kovarê de navên wekî Osman Çelik, Hinare Tajdin, Ruken Ehmed, Aysel Avesta Aydın, Xerib Hiso, Qasim Keşko, Ayhan Erkmen û Evin Şingali cih digirin.
“Adar û Nîsan: Hem Şahî Hem Jî Berxwedan”
Di sernivîsa kovarê de bal tê kişandin ser girîngiya mehên Adar û Nîsanê ji bo gelê Kurd û civaka Êzidî. Desteya weşanê diyar dike ku ev her du meh “weke xemla biharê” hatine amadekirin û wiha tê gotin:
“Adar di dîroka gelê me de ji her alî ve têr û tije ye. Çawa ku şiyarbûna xwezayê ye, di heman demê de meha Newrozê, serhildanê û azadiyê ye. Lê aliyê wê yê din jî jenosîd û koçberî ye ku gelê me hîna jî bi vê rewşê re rû bi rû ye.”
Mijarên Sereke: 8’ê Adarê û Çarşema Serê Nîsanê
Di hejmara 39’an de, cihêkî taybet ji bo têkoşîna jinan û Roja Jinên Kedkar ên Cîhanê (8’ê Adarê) hatiye veqetandin. Her wiha, pîroziya meha Nîsanê di baweriya Êzdatiyê de bi berfirehî hatiye nirxandin. Di kovarê de tê destnîşankirin ku:
Çarşema Serê Nîsanê: Weke roja avabûna gerdûnê û mizgîniya xêr û bereketê tê pênasekirin.
4’ê Nîsanê: Roja jidayikbûna Ocalan weke “ji nû ve jidayikbûna gelên bindest” û vegera li pîvanên civaka exlaqî û polîtîk hatiye şirovekirin.
Kovara Dîcle bi banga jiyaneke azad û parastina nirxên civakî, bi vê hejmarê careke din balê dikişîne ser dîrok û çanda herêmê.
