NAVENDA NÛÇEYAN (Nûpel) – Aloziya li Rojhilata Navîn ketiye qonaxeke nû û metirsîdar. Welatên Erebistana Siûdî, Îmarat, Behreyn, Urdin û Kuweytê ragihandin ku di nava çend saetên borî de rûbirûyî pêleke nû ya êrişên mûşekî û dronî yên Îranê bûne.
Ji 28ê Sibata borî ve, ev welat di bin agirê giran ê Tehranê de ne û zirareke mezin gihîştiye binesaziya sivîl û leşkerî.
Bîlançoya Êrişan li Gorî Welatan
Hêzên parastina asmanî ya welatên herêmê ji bo pûçkirina êrişan di amadebaşiyê de ne. Agahiyên dawî yên ji wezareten parastinê wiha ne:
Îmarat: Di êrişa dawî de 19 mûşekên balîstîk û 26 dron hatin xistin. Ji destpêka krîzê ve Îmaratê bi giştî rê li ber 457 mûşekên balîstîk û zêdetirî 2,000 dronan girtiye. Di encama van êrişan de heta niha 12 kesan (3 karmend/leşker û 9 sivîl) jiyana xwe ji dest dane.
Erebistana Siûdî: Wezareta Parastinê ragihand ku wan mûşekekî balîstîk û 5 dronên ku herêma Rojhilat dikirin armanc pûç kirine.
Kuweyt: Di nava 24 saetan de 2 mûşek û 13 dron hatin xistin. Kuweyt ji destpêka krîzê ve rûbirûyî zêdetirî 300 mûşekên balîstîk bûye.
Behreyn: Artêşa welat diyar kir ku di nava rojekê de 12 hedefên asmanî hatine pûçkirin.
Urdin: Rayedaran eşkere kir ku parçeyên mûşekên hatine xistin li çend herêman ketine xwarê, lê tenê zirara madî çêbûye.
Armanc û Zirarên Sivîl
Li gorî nûçeyên herêmî, êriş ne tenê baregehên leşkerî, lê belê balafirgeh, bender û avahiyên sivîl jî dikin armanc. Li Îmaratê heta niha 191 kes birîndar bûne û rewşa herêmê ji aliyê aborî û ewlehiyê ve ketiye bin xetereyê.
Îdiayên Tehranê
Tehran berpirsyariya van êrişan li ser xwe digire lê îdia dike ku hedefên wan ne welatên Ereb in. Karbidestên Îranî diyar dikin ku ev êriş wekî bersivdayîna “destdirêjiya Amerîka û Îsraîlê” tên kirin û îdia dikin ku tenê baregehên Amerîkayê yên li wan welatan dikin armanc.
Lê belê, amarên kuştî û birîndarên sivîl li van welatan, îdiayên Tehranê pûç dikin û nîşan didin ku şer rasterast bandorê li gelê herêmê dike.
/Çavkanî: Rûdaw/
