🔴NAVENDA NÛÇEYAN (Nûpel) – Di demekê de ku çav li ser agirbesta navbera Washington û Tehranê ne, medyaya Amerîkayê ragihand ku şandeyeke asta bilind a Îranê gihîştiye Pakistanê. Lê belê, dezgehên fermî û nîv-fermî yên Îranê ev nûçe bi tundî red kirin.
WSJ: Eraqçî û Qalîbaf li Pakistanê ne
Rojnameya navdar a Amerîkayê Wall Street Journal (WSJ), li ser zarê çavkaniyên xwe ragihand ku Wezîrê Karên Derve yê Îranê Ebas Eraqçî û Serokê Parlamentoyê Mihemed Baqir Qalîbaf, derengiya şeva pêncşemê gihîştine Îslamabada paytexta Pakistanê.
Ev serdan wekî pêngaveke dîrokî tê dîtin, ji ber ku ev cara yekem e piştî destpêkirina şerê 28ê Sibatê ku berpirsên herî bilind ên her du desthilatên Îranê (cîbicîkar û yasadanîn) bi hev re derdikevin derveyî welat.
Tehranê nûçe derewand
Berevajî îdiayên Amerîkayê, ajansên nûçeyan ên Îranê yên wekî Mehr, Fars û Tasnîm ku nêzîkî dezgehên ewlehiyê ne, ev nûçe red kirin. Ajansa Tasnîmê ya ser bi Supaya Pasdaran ve diyar kir ku agahiyên li ser çûyîna şandeyê “ne rast in” û bal kişand ser mercên Tehranê:
“Heta ku Amerîka pêbendî agirbestê nebe û rejîma Siyonîst li ser êrişên xwe berdewam be, danûstandin dê rawestandî bimînin.”
Pakistan Dibêje ‘Mazûvan im’, J.D. Vance di Rê de ye
Tevî redkirina Tehranê, amadekariyên li Pakistanê berdewam dikin. Tê payîn ku roja şemiyê danûstandinên rûbirû di navbera her du aliyan de dest pê bikin.
Li gorî agahiyan:
Aliyê Amerîkayê: Şandeya Washingtonê dê ji aliyê Cîgirê Serokê Amerîkayê J.D. Vance ve bê birêvebirin.
Armanc: Piştî lihevkirina li ser agirbesteke 14 rojî (ku şeva sêşemê pêk hat), alî dixwazin li ser domdariya vê pêvajoyê biaxivin.
