🔴NÛPEL – Di roja 38’emîn a şerê navbera Amerîka û Îranê de, li gorî îdiayên çapemeniya Amerîkayê, ji bo agirbesteke 45 rojî planeke ji du qonaxan pêk tê li ser masê ye. Hat ragihandin ku Tirkiye, Misir û Pakistan ji bo navbeynkariyê hewl didin.
Hewldanên Diplomatîk û Rolê Navbeynkaran
Li gorî nûçeya ku Wall Street Journal (WSJ) dispêre çavkaniyên agahdar; Tirkiye, Misir û Pakistan ji bo rawestandina şer an jî pêkanîna agirbesteke demkî ketine tevgerê. Hat diyarkirin ku wezîrên derve yên van her sê welatan bi Wezîrê Derve yê Îranê Abbas Arakçî û Nûnerê Taybet ê Serokê Amerîkayê Donald Trump, Steve Witkoff re bi rêya telefonê axivîne, lê heta niha encameke berbiçav nehatiye girtin.
Ji bo mazuvaniya muzakereyan bajarê Stenbolê û welatê Qatarê tên nîqaşkirin. Lê belê, hat îdiakirin ku Qatar naxwaze wê rola navbeynkariyê ya ku ji aliyê Amerîka û welatên Rojhilata Navîn ve lê hatibû barkirin, deynî ser milê xwe.
Plana Agirbestê ya 45 Rojî
Malpera nûçeyan a Amerîkî Axios, bi sernavê “plana du qonaxî” hûrguliyên muzakereyan parve kirin:
Qonaxa Yekem: Agirbesteke 45 rojî ya ji bo rawestandina şer.
Qonaxa Duyem: Peymana dawî ya ji bo bidawîkirina şer bi temamî. Di vê qonaxê de mijarên wekî rezervên uranyumê yên Îranê û ji nû ve vekirina Tengava Hurmuzê bên nîqaşkirin.
Tevî van hewldanan, çavkanî diyar dikin ku Îran tawîzan nade û daxwazên Amerîkayê yên ji bo bidawîkirina şer “nayên qebûlkirin” dibîne. Her wiha hat ragihandin ku Îranê daxwaza hevdîtina li Îslamabada paytexta Pakistanê red kiriye.
Li Eniya Şer: Hayfa û Welatên Kendavê di Bin Agir de ne
Li aliyê din şer bi tundî berdewam dike:
Êrîşa li ser Hayfayê: Di encama êrîşa moşekî ya Îranê ya li ser bajarê Hayfa yê Îsraîlê de, bîlanço giran bû. Di bin kavilên avahiyeke hilweşiyayî de cenazeyê 2 kesan hatin dîtin, lêgerîna 2 kesên winda jî berdewam dike.
Kuweyt û Îmarat: Îranê êrîşên xwe yên li ser welatên Kendavê yên ku mazuvaniya hêzên Amerîkayê dikin, zêde kirin. Artêşa Kuweytê û Wezareta Parastinê ya Îmaratê (BAE) ragihandin ku pergalên wan ên parastina hewayî li hemberî moşek û ÎHA-yên Îranê ketine tevgerê û gelek êrîş hatine pûçkirin.
