🔴DERSÎM (Nûpel) – Lêkolîner û nuştox Caner Canerik, peyê xebatêka derge û muraya heşt serran de, pirtûka xo ya bi nameyê “Sabe” bi zonê Kurdî, zaravaya Kirmançkî resna destê waneran. Na berhem ke netîceya qeydanê peyê serranê 2016an de amade bîya, Weşanxaneyê Donuşî (Dönüş Yayınları) ra vejiya.
Seba Çanda Dersîmî Çimeyêko Muhîm
Pirtûka “Sabe”, ke sey perçeyê rêzeya projeya “Kamile Dersîm” amade bîya, verê dinya û hîssanê şarê herême de kîfşêko hîra akena. Pirtûke de serê nêrînê şarî yê vera heyatî, şirovekerdişê dinya, deyîrê şahî û xemgînî, sanîkî, kîfşê komelî, bawerî, sanîkê afirnayîşî û hewnan ser o zaf agahîyê çimeyî estê.
Nuştox Caner Canerik derheqê weşanyayîşê pirtûke de hîssê xo wina ardî ziwan:
“Eke ez bîşêrî rêzeya ‘Kamile Dersîm’ temam bikerî, ez bawer kena ke derheqê Dêrsimê verênî de do setêka çimeyan ya zaf cîdî pê bêro. Ez sipasîya heme embazanê ke wextê nuştene û weşanayîşî de piştgirî daya mi kena.”
Xebata Heşt Serran
Na berhem peyê heşt serranê qeyda verêne re, bi ziwanê xo yo resen yanî bi kirmanckî ameya çapkerdene. “Sabe” sey pirtûka verêne ya projeyî, seba parastin û ravêrkerdişê vîra çandî ya herême, sey xebatêka akademîk û edebî yê qebûl bena.
Wanereyî nika eşkenê pirtûka “Sabe” weşanxaneyan û malperanê pirtûkan ra peyda bikerê.
