🔴NÛPEL – Serokê Partiya Demokrat a Kurdistanê (PDK) Mesûd Barzanî, têkildarî rageşî û xitimandina siyasî ya li Îraqê peyamek girîng belav kir. Barzanî hişyarî da ku hewildanên ji bo sepandina biryaran li ser pêkhateyan dê rewşê xirabtir bike û bang li aliyên siyasî kir ku rê nede kûrbûna krîzê.
Banga Ji Bo “Diyalogeke Cidî û Kûr”
Mesûd Barzanî di peyama xwe de rûyê xwe zivirand serkirdeyên Çarçoveya Hevahengiyê ya Şîe û Encumena Siyasî ya Niştimanî (Hevalbendiya Sunî) û daxwaz kir ku ji bo diyarkirina serokkomar û serokwezîr di parlamentoyê de lezê nekin. Barzanî destnîşan kir ku çareserî ne di lezbezê de, lê di “diyalogeke cidî û kûr” de ye.
“Divê Kurd bi Xwe Biryarê li ser Serokkomariyê Bidin”
Yek ji xalên herî girîng ên peyama Barzanî, parastina îradeya Kurdan a di nav pergala federal de bû. Barzanî destnîşan kir ku:
Pêvajoya demokratîk û prensîbên destûrî divê werin parastin.
Divê nûnertiya dadperwerane ji bo hemû pêkhateyan were dabînkirin.
Posta serokkomariyê divê nûnertiya hemû pêkhateya Kurd bike, ne ku tenê di bin kontrola partiyekê de be.
Krîza Siyasî ya piştî Hilbijartinên 2025an
Ev hişyariya Barzanî di demekê de tê ku piştî hilbijartinên parlamentoyê yên Çiriya Paşîna 2025an, Îraq di nav krîzeke dijwar a siyasî de ye. Her çend PDK bi bidestxistina zêdetirî milyonekî dengî wekî serkeftiyê sereke yê hilbijartinan derketibe jî, nakokiyên di navbera PDK û YNK’ê de yên li ser namzedê serokkomariyê hîn nehatine çareserkirin.
Hişyariya li ser “Winda kirina Baweriyê”
Barzanî bal kişand ser wê yekê ku derengketina gavên destûrî tenê nakokiyan kûrtir nake, di heman demê de baweriya gel a li hemberî pergalê jî kêm dike. Wî di dawiya peyama xwe de bang li hemû aliyan kir ku:
“Berjewendiyên bilind ên niştimanî bixin pêşiya her tiştî û bi rêya lihevtêgihiştinê xitimandina siyasî ji holê rakin.”
/rd/
