🔴NÛPEL – Koma çekdar a bi navê Ashabul Kehf, ku xwe wekî parçeyek ji “Berxwedana Îslamî” pênase dike, bi daxuyaniyekê ragihand ku wan di çend rojên borî de rêze-êriş birine ser berjewendiyên Amerîkayê yên li Herêma Kurdistanê.
Zêdebûna Êrişên bi Dronan
Li gorî agahiyên ku komê belav kirine, di demjimêrên dawî de bi taybetî li parêzgeha Hewlêrê nêzîkî 12 êrişên bi dronan hatine encamdan. Ashabul Kehf diyar kir ku ev operasyon beşek ji stratejiya wan a li dijî hebûna hêzên biyanî ne û hişyarî da ku: “Operasyonên me dê bi gurbûneke zêdetir bidomin.”
Hişyarî Ji Bo Sivîlan
Koma navborî di daxuyaniya xwe de bang li welatiyên sivîl kir ku ji bo parastina canê xwe, ji baregeh û navendên leşkerî yên Amerîkayê dûr bikevin. Ev hişyarî wekî nîşaneya berdewamiya êrişan tê nirxandin.
Hevkariya Komên Çekdar
Hate ragihandin ku Ashabul Kehf li gel komeke din a bi navê Saraya Awliya al-Dam, berpirsyariya piraniya wan çalakiyan girtine ser xwe ku ji 28ê Adarê ve li dijî baregehên Amerîkayê yên li Îraq û Herêma Kurdistanê tên kirin.
Gefên li Dijî Hêzên Biyanî û Wezareta Parastinê
Piştî gurbûna rageşiya di navbera Amerîka-Îsraîl û Îranê de, Ashabul Kehfê bi tundî gef li van aliyan xwarine:
Artêşa Amerîkayê û leşkerên Fransayê yên li Îraqê.
Xelkê biyanî û karmendên navneteweyî yên li Herêma Kurdistanê.
Berpirsên Wezareta Parastinê ya Îraqê: Komê hişyarî daye rayedarên Îraqî ku hevkariyê bi hêzên ku ew wekî “dagirker û biyanî” bi nav dikin re nekin.
/Çavkanî: Rûdaw/
