🔴Serokê DTSO’yê Mehmet Kaya di vekirina fûarê de destnîşan kir ku organîzasyonên bi vî rengî ji bo pêşketina aboriya herêmî faktoreke krîtik in û got: “Divê kêmasiyên di vî qadî de bên temamkirin.”
AMED – “Fûara Zincîrên Herêmî ya Başûrrojhilat” ku bi hevkariya Odeya Bazirganî û Pîşesaziyê ya Amedê (DTSO) û Federasyona Perakendefiroşan a Tirkiyeyê hat amadekirin, li Navenda Pêşangeh û Kongreya Navneteweyî ya Mezopotamyayê deriyên xwe ji ziyaretvanan re vekir.
Beşdariya Berfireh ji Sazî û Karsazan
Merasîma vekirina fûarê bi beşdariya Serokê DTSO’yê Mehmet Kaya, Hevşaredarê Bajarê Mezin ê Amedê Dogan Hatûn, Serokê Federasyona Perakendefiroşan a Tirkiyeyê Omer Duzgun, hevşaredarên navçeyan û nûnerên gelek saziyên sivîl û cîhana karsaziyê pêk hat.
Cara Yekem e Ji Derveyî Metropolan Tê Lidarxistin
Serokê DTSO’yê Mehmet Kaya di axaftina xwe ya vekirinê de bal kişand ser girîngiya stratejîk a fûarê û diyar kir ku ev cara yekem e organîzasyoneke wiha ji derveyî Stenbol û Enqereyê, li Amedê tê lidarxistin. Kaya anî ziman ku di salên dawî de qada fûaran li Tirkiyeyê hatiye îhmalkirin û wiha dewam kir:
“Organîzasyonên fûaran ji bo geşedana herêmî motora sereke ne. Ji bo em aboriya xwe mezin bikin, divê em kêmasiyên di vî warî de ji holê rakin.”
“Ev Fûar Nîşaneya Hilberînê ye”
Serokê Federasyona Perakendefiroşan Omer Duzgun jî da zanîn ku armanca wan ne tenê bazirganî ye. Duzgun got: “Ev organîzasyon nîşaneya hilberîna herêmî, ked û hewldana li qadê ye. Em piştgiriyê didin hilberînerên xwe yên herêmî.”
Hevdîtina Hilberîner û Perakendefiroşan
Hevşaredarê Bajarê Mezin Dogan Hatûn jî di axaftina xwe de bal kişand ser taybetmendiya fûarê ya ku navbeynkaran ji holê radike. Hatûn destnîşan kir ku ev der platformeke ku ji jinan heta karsazên herêmî her kes xwe tê de dibîne û got:
“Amed navenda hilberînê ya Mezopotamyayê ya qedîm e. Em dixwazin li gel pêşketina aborî, mîrateya xwe ya çandî jî xurt bikin.”
Piştî axaftinan, şandeya protokolê qurdeleyê birî û li stantên fûarê geriyan, agahî ji hilberîneran girtin. Hat ragihandin ku fûar dê bibe derfeteke mezin ji bo peymanên nû yên bazirganî û danasîna hilberên herêmî.
/Çavkanî: AW/
